मुख्यमंत्री कारंजा व मंगरुळपीरच्या बांधावर; मानोरा तालुक्याकडे मात्र पाठ! म्हसला ते मोहगव्हाणपर्यंत मुख्यमंत्र्यांची दुष्काळ पाहणी; मानोरा तालुक्यातील शेतकऱ्यांच्या व्यथा कधी ऐकणार?

वाशिम, दि. २४ सप्टेंबर : राज्यातील दुष्काळसदृश परिस्थितीची पाहणी करण्यासाठी मुख्यमंत्री देवेंद्र फडणवीस आज वाशिम जिल्ह्याच्या दौऱ्यावर आले. कारंजा तालुक्यातील म्हसला येथे त्यांनी शेतकऱ्यांच्या शेतात जाऊन पिकांची पाहणी केली. पावसाअभावी सोयाबीन, तूर, कापूस यासह खरीप पिकांचे झालेले नुकसान त्यांनी प्रत्यक्ष पाहिले. यावेळी शेतकऱ्यांनी आपल्या व्यथा मुख्यमंत्र्यांसमोर मांडत तातडीने मदतीची मागणी केली.

यानंतर मुख्यमंत्री मंगरुळपीर तालुक्यातील मोहगव्हाण येथे पोहोचले. दुष्काळसदृश परिस्थितीमुळे नुकसान झालेल्या शेतीची पाहणी करत त्यांनी शेतकऱ्यांशी संवाद साधला आणि पिकांच्या नुकसानीची माहिती घेतली. यावेळी धर्मगुरू आ. बाबुसिंग महाराज,खासदार संजय देशमुख, आ. सईताई डहाके,आमदार श्याम खोडे, आमदार राजेश बकाने,मुख्यमंत्री ओएसडी अमोल पाटणकर , भक्तराज महाराज, भाजपा जिल्हाध्यक्ष, तालुका अध्यक्ष,सहकार नेते  सुरेश पाटील गावंडे,तसेच संबंधित अधिकारी उपस्थित होते.

## शेतकऱ्यांचा आक्रोश मुख्यमंत्र्यांसमोर

म्हसला येथे मुख्यमंत्री पोहोचताच काही शेतकऱ्यांनी दुष्काळ जाहीर करण्याची मागणी केली. पावसाअभावी पिकांचे मोठे नुकसान झाले असून, शेतकऱ्यांना तातडीने आर्थिक मदत मिळावी, अशी मागणी करण्यात आली. शेतकऱ्यांनी मुख्यमंत्र्यांना निवेदनही दिले.

दरम्यान, मुख्यमंत्री फडणवीस यांनी वाशिम दौऱ्यात शेतकऱ्यांच्या प्रश्नांवर मदतीचे आश्वासन दिले. तसेच राज्यात कोरड्या दुष्काळासंदर्भात शासन निर्णय काढण्याबाबतही त्यांनी घोषणा केल्याचे वृत्त आहे.

## मग मानोरा तालुक्याचा काय?

मुख्यमंत्र्यांचा वाशिम जिल्ह्यातील दुष्काळ पाहणी दौरा सुरू असताना मानोरा तालुक्यातील शेतकऱ्यांच्या प्रश्नांकडे मात्र लक्ष कधी जाणार?, असा सवाल आता उपस्थित होत आहे.

मानोरा तालुक्यातही पावसाच्या अनिश्चिततेमुळे शेतीसमोर गंभीर प्रश्न निर्माण झाले आहेत. खरीप हंगामातील पिकांची स्थिती, पाण्याची उपलब्धता, सिंचनाची अडचण आणि शेतकऱ्यांचे आर्थिक नुकसान याबाबत स्थानिक पातळीवर सातत्याने चिंता व्यक्त होत आहे. अशा परिस्थितीत मुख्यमंत्र्यांनी जिल्ह्याच्या दौऱ्यात मानोरा तालुक्यातील शेतीचीही पाहणी करावी, अशी अपेक्षा शेतकरी वर्गातून व्यक्त होणे स्वाभाविक आहे.

## दौरा दोन तालुक्यांत; मानोरा मात्र प्रतीक्षेत

कारंजा तालुक्यातील म्हसला आणि मंगरुळपीर तालुक्यातील मोहगव्हाण येथे मुख्यमंत्री स्वतः शेतकऱ्यांच्या बांधावर पोहोचले. त्यामुळे या भागातील शेतकऱ्यांना आपल्या समस्या थेट मुख्यमंत्र्यांसमोर मांडण्याची संधी मिळाली. मात्र, मानोरा तालुक्याचा या पाहणी दौऱ्यात समावेश नसल्याने येथील शेतकऱ्यांच्या प्रश्नांना थेट मुख्यमंत्र्यांपर्यंत पोहोचण्याची संधी कधी मिळणार, हा प्रश्न कायम आहे.

## सुरेश पाटील गावंडे व विजय पाटील यांचे मुख्यमंत्री यांना निवेदन 

कारंजा तालुक्यात मुख्यमंत्री देवेंद्र फडणवीस भेटी करिता आले असता मानोरा तालुक्यातील सहा ही महसूल मंडळातील पीक पाहणी करून कोरडा दुष्काळ जाहीर करण्याची मागणी गावंडे यांनी निवेदनातून दिली निवेदनावर राजेश्वर चव्हाण, राहुल भगत, बबन देशमुख, दिनेश मोरे व सरपंच शंकर राठोड यांची स्वाक्षरी आहे. तर पोहरादेवी जिल्हा परिषद सर्कल दुष्काळ ग्रस्त जाहीर करण्याची मागणी विजय पाटील यांनी केली आहे.

## फक्त पाहणी नव्हे, प्रत्यक्ष मदतीची अपेक्षा

दुष्काळसदृश परिस्थितीची पाहणी करून प्रशासनाला परिस्थितीचे गांभीर्य समजते; मात्र शेतकऱ्यांसाठी खरी अपेक्षा आहे ती वेळेत पंचनामे, पीक नुकसानीची भरपाई, पीक विम्याचा लाभ आणि आवश्यक शासकीय मदतीची.

lमुख्यमंत्री जिल्ह्यात आले आहेत, शेतकऱ्यांच्या बांधावर गेले आहेत, त्यांच्या व्यथा ऐकल्या आहेत. आता या दौऱ्यानंतर शासनाच्या निर्णयातून शेतकऱ्यांना प्रत्यक्ष दिलासा किती आणि किती लवकर मिळतो, याकडे संपूर्ण वाशिम जिल्ह्याचे लक्ष लागले आहे.

मानोरा तालुक्यातील शेतकऱ्यांचा प्रश्नही याच दौऱ्याच्या पार्श्वभूमीवर अधिक ठळक झाला आहे. मुख्यमंत्री वाशिम जिल्ह्याच्या इतर तालुक्यांतील शेतकऱ्यांच्या बांधावर पोहोचले; आता मानोरा तालुक्याच्या बांधावरही शासनाची नजर कधी पडणार, हा प्रश्न शेतकरी विचारत आहेत.